ปกตูปนิสฺสโย – ปีติสหคตญฺจ สุขสหคตญฺจ สทฺธํ อุปนิสฺสาย อุเปกฺขาสหคเตน จิตฺเตน ทานํ เทติ …เป.… อภิญฺญํ อุปฺปาเทติ…เป.… ทิฏฺฐิํ คณฺหาติฯ ปีติสหคตญฺจ สุขสหคตญฺจ สีลํ…เป.… ปตฺถนํ อุปนิสฺสาย อุเปกฺขาสหคเตน จิตฺเตน ทานํ เทติ…เป.… นิคมฆาตํ กโรติฯ ปีติสหคตา จ สุขสหคตา จ สทฺธา…เป.… ปตฺถนา อุเปกฺขาสหคตาย สทฺธาย…เป.… ปตฺถนาย อุปนิสฺสยปจฺจเยน ปจฺจโยฯ (3)

ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – ปีติสหคตญฺจ สุขสหคตญฺจ สทฺธํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ, สีลํ สมาทิยติ, อุโปสถกมฺมํ กโรติฯ ปีติสหคตญฺจ สุขสหคตญฺจ ฌานํ อุปฺปาเทติ, วิปสฺสนํ อุปฺปาเทติ, มคฺคํ อุปฺปาเทติ, สมาปตฺติํ อุปฺปาเทติ, มานํ ชปฺเปติ, ทิฏฺฐิํ คณฺหาติฯ ปีติสหคตญฺจ สุขสหคตญฺจ สีลํ… สุตํ… จาคํ… ปญฺญํ… ราคํ… โมหํ… มานํ… ทิฏฺฐิํ… ปตฺถนํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ, สีลํ สมาทิยติ, อุโปสถกมฺมํ กโรติฯ ปีติสหคตญฺจ สุขสหคตญฺจ ฌานํ อุปฺปาเทติ…เป.… สมาปตฺติํ อุปฺปาเทติฯ ปีติสหคเตน จ สุขสหคเตน จ จิตฺเตน อทินฺนํ อาทิยติ, มุสา ภณติ, ปิสุณํ ภณติ, สมฺผํ ปลปติ, สนฺธิํ ฉินฺทติ, นิลฺโลปํ หรติ, เอกาคาริกํ กโรติ, ปริปนฺเถ ติฏฺฐติ, ปรทารํ คจฺฉติ, คามฆาตํ กโรติ, นิคมฆาตํ กโรติฯ ปีติสหคตา จ สุขสหคตา จ สทฺธา…เป.… ปตฺถนา ปีติสหคตาย จ สุขสหคตาย จ สทฺธาย…เป.… ปตฺถนาย อุปนิสฺสยปจฺจเยน ปจฺจโยฯ (4)

อาเสวนปจฺจโย

[37] ปีติสหคโต ธมฺโม ปีติสหคตสฺส ธมฺมสฺส อาเสวนปจฺจเยน ปจฺจโย – ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ ปีติสหคตานํ ขนฺธานํ อาเสวนปจฺจเยน ปจฺจโยฯ ปีติสหคตํ อนุโลมํ ปีติสหคตสฺส โคตฺรภุสฺส… อนุโลมํ โวทานสฺส… โคตฺรภุ มคฺคสฺส… โวทานํ มคฺคสฺส อาเสวนปจฺจเยน ปจฺจโยฯ (1)